හෙමින් එන්න…
පාටත් අරන් එන්න…
හීනයක් තියේ ඇහැ ගාව
පාට කරනවද ඒ හීනය…
ඔය සුමුදු ඇඟිලි තුඩු අග
ලස්සන පාට තවරාගෙන
පාට කරනවද මගේ හීනය…
ඇඟිලි තුඩු කැත වෙලාද..?
නෙක පාට කලවම් වෙලාද..?
තරහා යාවිද මාත් එක්ක…
ලස්සන අතැඟිලි කළාට අවලස්සන.
බය නොවී එන්න…
ඔය පාට මැකේවී …
ඔයා පාට කරපු හීනය…
ලස්සනට දිලිසේවී…
හෙමින් එන්න…
පාටත් අරන් එන්න…
©වාරා (ASD)
27/02/2018
රවන විට අඬන
අඬන විට රවන
සිනාවට සිනාව පූදින
කඳුළින් කඳුළු උනන
අරුම පුදුම,
උඹ සහ මම.
©වාරා (ASD)
24/05/2018
ප්‍රේමයත් රැඩිකල් දෙයක්
මිමිණුවා මං සෙමින්
කොහොමද එහෙම වෙන්නේ
අැසුවා ඔහු විස්මයෙන්
කිසිවෙක්ට නොබැදි ඇගේ සිත
බැදලන්නට මගේ නමින්
මා කරමි අරගලයක්..!
ඈ තැනූ බාධක බිදදමා
නොනැවතී යමි ඇය කරා
මා නවතනු නොහැකි බව දැක
යටත් වුනි ඈ ආයුධ බිම දමා
නමුත්…..
මගේ වූ විට ඇය දුටුමි මම
අරගලය තව ඉවර නෑ කියා
හංදියේ අත ඇල්ලුවොතින් අප
නෑ සනුහරේ එයි පොලිසිය වෙලා
දෙතොල සිප ගන්නට පමණක්
මාස්ටර් ප්ලෑන් සිතන්නට වෙලා
විදින විට කාලයක් පෙම් සුව
සිතුවේ අරගලය ඉවරයි කියා
ගෙදරට කියමු යැයි ඇය කී විට
අරගලේ උණුසුම තව වැඩි වුනා
මා පවුල අත බැටන් පොළුය
ඇගේ පවුල අත පිස්තෝලය
මර්දනය කෙරුමට අප ප්‍රේමය
පවුල් දෙක එක්වූ හැටි අපූරුය
ගලක් මෙන් සවිමත්ව අප දෙපල
ගෙන ගියෙමු අරගලය දිගටම
වැටහුනු කල බිදිය නොහැකි බව
මර්දනය අතහැර විසදුම දුන්නෝය
ඉතින් සතුටුයි අපි දෙන්නාටම..!
දැන් ඉතින් ඉවරමයි අරගලය
සුසුමක් හෙළුනි මටත් නොදැනිම
සුසුම පිටවී මොහොත යද්දී
ඕනි කිව්වයි සුපිරි වෙඩිමක්..!
අහෝ නිමක් නැති අරගලයක්..!
ඉතිං මිතුර මා කියන්නෙමි
ප්‍රේමයත් රැඩිකල් දෙයක්…!
©වාරා (ASD)
03/12/2017
